Sa Isaiah 45:7, hindi totoong sinabi iyan ng Diyos. Ipinalabas lang ni Propeta Isaiah na sinabi ito ng Diyos dahil iniisip niya na ganito ang Diyos. Bakit ko nasabi ito? Dahil ang mga salita at gawa ni Cristo ang una kong pinagbatayan at ito ang isasagot ko sa'yo.
Dahil hindi lubos na kilala ng mga Propeta at apostol ang Diyos Ama. Dahil sabi ni Cristo walang nakakakilala sa Anak kundi ang Ama, at walang nakakakilala sa Ama kundi ang Anak, at sinumang ibiging pagpahayagan ng Anak (Mateo 11:27). Ito ang ipinahayag sa akin ni Cristo, na kahit sinong propeta o apostol man ay hindi lubos na kilala ang Ama tanging si Cristo lang sapagkat bumaba Siyang mula sa langit (Juan 6:38). Bumaba rin ba mula sa langit ang mga propeta at apostol para masabing lubos nilang kilala ang Diyos? Kailanma'y walang nakakita sa Diyos, ang Bugtong na Anak na minamahal ng Ama, Siya ang nagpakilala sa Kanya (Juan 1:18). Si Cristo ang nagpakilala sa tunay na katauhan ng Ama sa pamamagitan ng Kanyang mga salita at gawa. Sabi ni Cristo hindi makagagawa ang Anak ng anuman sa kanyang sarili kundi ang makita niyang gawin ng Ama. Sapagkat anumang ginagawa ng Ama ay siya ring ginagawa ng Anak at ipinakikita ng Ama ang lahat ng Kanyang ginagawa sa Anak (Juan 5:19-20). Ipinapakita lang nito na lahat ng ginawa ni Cristo habang Siya ay nasa mundo pa, yun lang ang mga nakikita niyang ginagawa ng Ama. Sabi rin ni Cristo, sapagka't walang mabuting punong kahoy na nagbubunga ng masama; at wala rin naman masamang punong kahoy na nagbubunga ng mabuti. Sapagka't bawa't punong kahoy ay nakikilala sa kaniyang sariling bunga (Lucas 6:43-44). Ito ang katibayan na lahat lamang ng masamang gawa ay mula sa diablo at lahat ng mabuting gawa ay mula sa Diyos. Sabihin nating ang Diyos ay isang mabuting punong kahoy kaya hindi ito maaaring magbunga ng masama. At bawat punong kahoy ay nakikilala sa kanyang sariling bunga (mga gawa). Ngayon ipakita mo sa akin, saan sa mga gawa ni Cristo na mga nakita niya mula sa Ama ang sinasabi sa Isaiah 45:7 na lumilikha rin ang Diyos ng kasamaan? Kung may maipakita ka sa akin sa Biblia ng lahat ng mga gawa ni Cristo na gumawa rin Siya ng kasamaan, maniniwala na ako sa sinasabi sa Isaiah 45:7 na lumilikha nga ang Diyos ng kasamaan. Hindi ko sinasabing hindi na dapat pagkatiwalaan ang mga salita ng mga propeta. May ibang pagkakamali lamang sila ukol sa pagpapakilala sa Diyos. Dumating si Cristo upang sinumang maniwala sa Kanya ay maligtas at gayundin itama ang mga maling pagpapakilala sa Ama. Sapagkat bumaba Siyang mula sa langit kaya Siya ang lubos na nakakakilala sa Ama at nakasama Niya na ang Ama bago pa ipinanganak ang mga propeta at apostol. Salamat.